Abanyamuryango ba Unity Club Intwararumuri bakuye isomo ku Rwibutso rwa Jenoside rwa Murambi

Abanyamuryango ba Unity Club Intwararumuri bagaragaje ko bafite umukoro wo guharanira ko amateka mabi yaranze abayobozi bo hambere atazongera kubaho ukundi ahubwo bagaharanira kwimakaza ubuyobozi buzira amacakubiri n’ingengabitekerezo ya Jenoside.

Ni ubutumwa bagarutseho kuri uyu wa Gatanu, tariki ya 3 Gicurasi 2024, ubwo basuraga Urwibutso rwa Jenoside rwa Murambi mu Karere ka Nyamagabe.

Aba banyamuryango ba Unity Club Intwararumuri bavuga ko gusura Urwibutso rwa Murambi biri muri gahunda yo kureba no gusobanurirwa uko abayobozi bafashe iya mbere mu kwica Abatutsi bari bahahungiye aho kubarinda nk’uko babibizezaga.

Umuyobozi Mukuru wungirije wa Mbere wa Unity Club Intwararumuri, Kayisire Marie Solange, yavuze ko ari inshingano zabo nk’abayobozi guharanira imiyoborere myiza iganisha igihugu aheza hazira amacakubiri n’ingengabitekerezo ya Jenoside.

Urwibutso rwa Jenoside rwa Murambi rushyinguyemo imibiri y’Abatutsi bishwe muri Jenoside isaga ibihumbi 50. Rufite umwihariko wo kugaragaza uruhare rw’ubutegetsi bubi mu mateka mabi y’itotezwa n’ubwicanyi byakorewe Abatutsi, bikanagera ku ndunduro ya Jenoside yakorewe Abatutsi mu 1994.