COVID-19: Afurika y’Epfo yahagaritse gukoresha urukingo rwa AstraZeneca
Leta ya Afurika y’Epfo yahagaritse ibikorwa byo gukingira Coronavirus hifashishijwe urukingo rwa AstraZeneca, nyuma y’uko ubushakashatsi bwerekanye ko ubushobozi bwarwo bwo guhashya ubwoko bushya bw’ako gakoko kihinduranya ari buke.
Ubushakashatsi buheruka gukorerwa ku bantu 2000 bwagaragaje ko urukingo rwa AstraZeneca rwakozwe n’Abongereza bafatanyije n’Abahinde rushobora kurinda uwaruhawe kwandura ubwoko bushya bwa Coronavirus yihinduranya bwagaragaye muri icyo gihugu, ku gipimo cya 20%.
Ni mu gihe abashakashatsi berekana ko 90% by’ubwandu bugaragara muri icyo gihugu cyugarijwe cyane muri Afurika kugeza ubu, buba bwatewe n’ubwo bwoko bushya bwihinduranya.
Afurika y’Epfo yari yaramaze kugura inkingo za AstraZeneca zibarirwa muri miliyoni ndetse ku giciro kiri hejuru, hakaha hitegurwaga ibikorwa byo gutangira gukingira abaturage.
Ubu icyo gihugu cyabuze ayo gicira n’ayo kimira nyuma yo gutakaza akayabo k’amadolari ku nkingo bikagaragara ko ntacyo zagifasha mu kugabanya impfu n’ubwandu bya Coronavirus bikomeje gutumbagira ubutitsa.
Ku rundi ruhande ariko Ishami ry’Umuryango w’Abibumbye ryita ku Buzima, OMS, ryabwiye icyo gihugu ko cyanakomeza gukoresha urwo rukingo kuko rushobora gufasha kugabanya indembe za COVID-19 n’abarwayi buzura mu bitaro.
Afurika y’Epfo ubu imaze kugira ubwandu bwa Coronavirus miliyoni 1.5, aho abasaga miliyoni 1.4 bakize iyo ndwara naho abasaga ibihumbi 46 ikabahitana.
