Ethiopia: Abasirikare barimo kubuza impunzi zo muri Tigray kujya muri Sudan

Ingabo za Ethiopia zagabwe ku mupaka ihuza iki gihugu na Sudan ngo zihagarike impunzi zihunga ziva muri leta ya Tigray zijya muri iki gihugu.

Ni mu gihe hari kuba imirwano hagati y’ingabo za Ethiopia n’iza leta ya Tigray – imwe mu zigize Ethiopia – z’ishyaka riri ku butegetsi muri iyo leta rya Tigray People Liberation Front (TPLF).

Biragoye kubona amakuru y’ibihabera kubera ko uburyo bw’itumanaho bwahagaze, bituma hari ubwoba ku mutekano n’imibereho y’abaturage b’abasivile nk’uko BBC ibitangaza.

Leta ya Ethiopia yavuze ko igiye kugaba igitero simusiga ku murwa mukuru Mekelle wa Tigray.

Ni nyuma y’aho igihe ntarengwa cy’amasaha 72 leta yari yahaye ingabo za Tigray ngo zimanike amaboko zemere ko zatsinzwe cyarangiye ejo ku wa Gatatu, zitabikoze.

Umunyamakuru wa BBC Anne Soy, uri ku gice cya Sudan cyo ku mupaka na Ethiopia, avuga ko umugezi wa Sittet uri i Hamdayit muri leta ya Kassala mu burasirazuba bwa Sudan, ari ahantu h’ingenzi hari kwambukira abahunga imirwano bava muri Tigray.

Akanama ka Sudan gashinzwe kwita ku mpunzi kavuze ko muri rusange karimo kwakirira aho hantu impunzi zigera ku 1,200 buri munsi.

Ku wa Gatatu, umunyamakuru wa BBC yabonye abasirikare babarirwa mu icumi bashinze ibirindiro ku misozi yitegeye uwo mugezi. Impunzi zavuze ko ari abasirikare ba Ethiopia, ndetse ko bamaze igihe babuza abantu kwambukira muri Sudan.

Leta ya Ethiopia ntabwo yasubije ubusabe bwa BBC bwo kugira icyo ibivugaho.

Impunzi nyinshi zimaze igihe zitegereje ko abo mu miryango yazo bazisanga muri Sudan, zihangayikishijwe n’aya makuru mashya.