Indonesia yahagaritse ikoreshwa ry’urukingo rwa Astrazeneka
Igihugu cya Indonesia cyatangaje ko cyahagaritse ikoreshwa ry’Urukingo rwa Covid19 rwa Astrazeneka, bitewe n’amakuru y’uko bamwe mu barufashe ku mugabane w’Uburayi rwabagizeho ingaruka zirimo kuvura kw’Amaraso.
Indonesia yatangaje ko izategereza indi nyigo y’uru rukingo izaturuka mu muryango w’Abibumbye Ishami ryita ku buzima OMS nk’uko Minisitiri w’Ubuzima w’iki gihugu yabitangaje.
Ibiro ntaramakuru by’Abongereza, Reuters bikorera muri iki gihugu, bitangaza ko Abashinzwe ibijyanye n’imiti ku mugabane w’Uburayi batangaza ko izi ngaruka zagaragaye ku bafashe uru rukingo, nta gihamya cy’uko arirwo rwazibateye. Abakoze uru rukingo nabo kuwa Gatanu batangaje ko ubugenzuzi bakoze kuri uru rukingo bwagaragaje ko nta ngaruka zirimo kuvura kw’amaraso rutera.
“Mu rwego rwo kwirinda, ikigo gishinzwe ubugenzuzi bw’ibiribwa n’imiti kibaye gisubitse gukingira abantu urukingo rwa Astrazeneka, mu gihe hagitegerejwe andi makuru azaturuka muri OMS.”
Byatangajwe na Minisitiri w’Ubuzima wa Indonesia Budi Gunadi Sadikin abibwira inteko ishinga amategeko y’iki gihugu kuri uyu wa Mbere.
Indonesia yari imaze kwakira doze miliyoni imwe n’ibihumbi ijana (1,100000) z’urukingo rwa Astrazeneka yakiriye binyuze muri gahunda ya COVAX igamije kugeza urukingo ku bihugu bikennye, muri uku kwezi kwa Werurwe 2021, mugihe bari bategereje kwakira izindi doze miliyoni 10 mu kwezi gutaha.
Kuwa Gatanu Thailand nicyo gihugu cya mbere kitari icyo ku mugabane w’ Uburayi cyahagaritse ikoreshwa ry’Urukingo rwa Covid19.
Kugeza ubu Indonesia irakomeza gukoresha urukingo rwa Sinovac Biotech rwakorewe mu Bushinwa.
Indonesia yiyongereye ku bihugu nk’Ubuholandi, Denmark, Norvège, Bulgaria, Iceland, Ireland na Thailand mu guhagarika ikoreshwa ry’urukingo rwa Astrazeneka bitewe n’impungenge z’ingaruka z’uru rukingo.
