Perezida Kagame ati” Ubu ni inkuru nziza kubona inkingo za COVID-19 zigeze muri Africa”
Perezida Paul Kagame abinyujije kuri Twitter yagaragaje ko yishimiye kuba u Rwanda rwabonye inkingo za mbere zo gukingira abaturage Covid-19, iki cyiciro cy’ingingo ni izihutirwa zizahabwa abazikeneye cyane batoranyijwe.
yanditse ati “Kwari ugutegereza igihe kirekire, bamwe bari biteguye cyane, ndetse biteguye kurushaho.. simvuze ‘ibyo kugira uburenganzira bungana n’abandi’, ariko twese dukeneye inkingo byihutirwa.
Yongeyeho ati “Ubu ni inkuru nziza kubona inkingo za COVID-19 zigeze muri Africa zihereye muri Ghana…Muri iki gitondo no mu Rwanda n’ahandi. Ndashimiye.”
Mu gitondo kuri uyu wa Gatatu, u Rwanda rwakiriye inkingo 240,000 zo gukingira Coronavirus, ni izo mu bwoko bwa AstraZeneca zaje ‘muri gahunda ya Covax. Hategerejwe izindi nkingo 102,960 zo mu bwoko bwa Pfizer zigera i Kigali saa 19h15
Gahunda y’ikingira mu gihugu hose izahita itangira ihereye ku matsinda y’abafite ibyago byo kwandura/kuzahazwa na COVID 19 kurusha abandi. Ni ukuvuga abaganga n’abandi bafata iya mbere mu kurwanya iki cyorezo, abafite imyaka 65 kuzamura, abafite uburwayi karande n’abafite ubumuga
Ibindi bihugu bya Africa byabonye inkingo binyuze mu buryo bwa Covax harimo Kenya yakiriye izigera kuri miliyoni imwe zo mu bwoko bwa Oxford-AstraZeneca, DR.Congo izigera kuri miliyoni 1.7, Angola yakiriye 624,000, Gambia ku 36,000.
Umugabane wa Africa umaze kubona inkingo miliyoni 900 zabashije kuganirwaho mu nzira zitandukanye ariko ntiziragera mu bihugu, zishobora gukingira 30% by’abatuye Africa bagera kuri miliyari 1.3.
