Rwanda: Abarenga ibihumbi 51 bafashwe barenze ku mabwiriza yo kwirinda COVID19
Polisi y’u Rwanda yashyize ahagaragara imibare y’abantu bafashwe barenze ku mabwiriza yo kwirinda COVID19, guhera tariki ya 29 Ukuboza 2020 kugeza tariki ya 4 Mutarama 2021.
Abanyamaguru bafashwe batambaye agapfukamunwa mu buryo bukwiriye, abatarubahirije intera hagati yabo na bagenzi babo ndetse n’abafashwe barenze amasaha yo kuba abantu bageze mu rugo, ni ibihumbi 47,947.
Abafashwe bacuruza inzoga mu buryo butemewe, abandi nabo banywa inzoga hatubahirijwe amabwiriza yo kwirinda COVID19, ni ibihumbi 2,464.
Muri iki gihe kandi hafashwe imodoka 616 ba nyirazo batubahirije amasaha yo kuba mu rugo cyangwa batambaye agapfukamunwa, ni 616.
Moto zafashwe na banyirazo batubahirije amasaha yo kuba mu rugo cyangwa batambaye agapfukamunwa, ni 415.
Abanyamagare, Abanyonzi bafashwe nabo batubahirije amasaha yo kuba mu rugo cyangwa batambaye agapfukamunwa neza, ni 285.
Iyi akaba ari imibare umuvugizi wa polisi CP John Bosco Kabera yatangarije RadioTv10.
Imibare ya minisiteri y’Ubuzima igaragaza ko kuva icyorezo cya COVID19 cyagera mu Rwanda muri Werurwa 2020, kugeza ubu abantu ibihumbi 8,955 aribo bamaze kwandura iki cyorezo, muri bo abagera ku 6,878 bamaze kuvurwa bagakira, mugihe nanone abandi 110 kimaze kubahitana.
Imibare irenga kimwe cya kabiri cy’abahitanywe na COVID19, bapfuye mu kwezi kwa 12 umwaka wa 2020 ndetse no mu matariki atangira umwaka wa 2021.
Inama y’Abaminisitiri yateranye kuwa mbere tariki ya 4 Mutarama 2021, nyuma yo gusuzuma ubwiyongere bw’iki cyorezo, yakajije ingamba, aho kugeza ubu ingendo zihuza uturere n’utundi ndetse n’umujyi wa Kigali zahagaritswe, ibikorwa by’ubucuruzi nabyo bikaba bigomba gufunga saa kumi n’ebyiri z’umugoroba (18h00).
